پوچیفسٹروم : ( ویب ڈیسک ) ویمنز انڈر 19 ٹی 20 ورلڈ کپ کے سپر سکس مرحلے میں پیر کے روز ( آج ) دو میچز کا فیصلہ ہوگا، پاکستان اور آئرلینڈ جبکہ آسٹریلیا اور متحدہ عرب امارات کی ٹیمیں مدمقابل ہوں گی۔
رپورٹ کے مطابق انٹرنیشنل کرکٹ کونسل (آئی سی سی) کے زیر اہتمام پہلے خواتین انڈر 19 ورلڈ کپ کے دلچسپ مقابلے جنوبی افریقہ میں جاری ہیں، سپر سکس مرحلے میں پیر کے روز مزید 2 میچوں کا فیصلہ ہو گا ، پہلے میچ میں پاکستان اور آئرلینڈ کی انڈر 19 کی ٹیمیں مدمقابل ہوں گی ، آئرلینڈ کو پہلے میچ میں انگلینڈ کے ہاتھوں شکست کا سامنا کرنا پڑا تھا۔
اسی روز دوسرا میچ آسٹریلیا اور متحدہ عرب امارات کے درمیان کھیلا جائے ، آسٹریلیا کی ٹیم اپنے میچ بھارت کو شکست دے چکی ہے، دونوں میچز پوچیفسٹروم کے مقام پر کھیلے جائیں گے۔
یاد رہے کہ پاکستانی ٹیم اپنا دوسرا اور آخری میچ 24 جنوری کو نیوزی لینڈ کے خلاف کھیلے گی۔
