2020ء: ہالی ووڈ اور بالی ووڈ پر موت کے سائے

لاہور: (دنیا نیوز) ہالی ووڈ نے گزشتہ سال کورونا وباء کے باعث ماضی کے مشہور اداکاروں کو کھو دیا۔ شہرہ آفاق فلم جیمز بانڈ کے دونوں مرکزی کردارشان کونرے اور ہونر بلیک مین بھی اسی سال انتقال کرگئے۔

ابھرتی ہوئی سٹار لیکسی علیجائی 21 سال کی عمر میں فوت ہوئیں۔ مشہور شخصیت بگ برادر سٹار اور ٹی وی اداکار ڈریک ایکورہ 69 سال کی عمر میں نمونیا کی وجہ سے فوت ہوگئے۔

امریکی ہارر سٹوری اداکار ہیری ہینس صرف 27 سال کی عمر میں دماغی مرض کے باعث چل بسے۔ مشہور بٹی شو کے خالق سلویو ہورٹا کا ایک مشتبہ خودکشی کے بعد انتقال ہوگیا۔ وہ میامی کے ایک ہوٹل کے کمرے میں مردہ حالت میں پائے گئے۔

دی بسل برش شو میں مسٹر ڈیریک کے نام سے مشہور ہونے والے ڈیریک فولڈس دل کے عارضہ کے باعث انتقال کرگئے۔لیجنڈ اداکار کرک ڈگلس 103 سال کی عمر میں انتقال کر گئے۔وہ ہالی ووڈ کی سلور اسکرین کے سب سے بڑے اداکار تھے۔

مشہور ہالی ووڈ فلم باڈی گارڈ میں بہترین اداکاری دیکھانے والے جان شفپنل کا کینسر کے باعث گزشتہ سال انتقال ہوگیا۔معروف گٹارسٹ ایڈی وین ہیلن کیلیفورنیا میں طویل علالت کے باعث65سال کی عمر میں انتقال کرگئے۔ان کا شمار 20بہترین فروخت ہونے والی ریکارڈنگ والے اداکاروں میں ہوتا ہے۔ایونجرز فلم میں سیکریٹ ایجنٹ کا کردار اداکرنے والی دیانا ریگ کا 82سال کی عمر میں انتقال ہوگیا۔بچوں میں مقبول ترین بافٹا ایوارڈ سیریز سوآکورڈ میںجوہر دیکھانے والے نوعمر اداکارآرچی لینڈہیرٹ صرف19سال کی عمر میں چل بسے ۔28اگست کوچیڈ ویک بوس مین کا بھی انتقال ہوا۔ چیڈویک نئی نسل میں مشہورمتعدد سائنس فکشن موویز میں اہم رولز اداکرنے کے باعث خاصے مشہورتھے۔

کورونا وائرس پھیل جانے کے بعدصرف دو ایوارڈ زکی تقاریب کا انعقاد کیا گیا۔ 28 فروری کو 45 واں کیسار ایوارڈز اور03 مارچ کو ہونے والے جاپان اکیڈمی فلمی ایوارڈ منعقدکیے گئے، تاہم یہ تقریب بغیر کسی مہمان کے منعقد کی گئی۔ 14 ویں سی یو ایوارڈز نے 7 مارچ کو ٹوکیو میں ہونے والی اپنی براہ راست تقریب منسوخ کردی اور اس کے بجائے فاتحین کو نپون کلچرل براڈکاسٹنگ کے انٹرنیٹ ریڈیو پروگرام پر نشرکیا۔ چالیسواں گولڈن راس بیری ایوارڈ 14 مارچ کو ہوناتھا،تاہم اسے منسوخ کردیا گیا۔ اس تقریب کے فاتحین کا اعلان ان کے یوٹیوب چینلز پر 16 مارچ کو کیا گیا۔بین الاقوامی فلم اکیڈمی ایوارڈ جس کاانعقاد 27 مارچ کو ہونا تھا ، منسوخ کردیا گیا، جبکہ اطالوی اکیڈمی کی ڈیوڈ ڈی ڈونٹییلو کی تقریب بھی ملتوی کردی گئی ہے۔

تاحال کورونا کے باعث بگڑتے حالات کے پیش نظر عالمی شہرت یافتہ اکیڈمی ایوارڈز اور گولڈن گلوب ایوارڈز نے ان کے 2021 ایڈیشن کے لئے اہلیت کے معیار میں ترمیم کردی ہے ، کیونکہ اس کے لیے عام طور پر یہ لازمی ہوتا ہے کہ کم سے کم وقت کے لئے فلم کو سینما میں لازماً دکھایا جائے۔15 جون کو اعلان کیا گیا کہ اکیڈمی ایوارڈز کو 28 فروری سے 25 اپریل تک دو مہینوں تک ملتوی کردیاگیا اور بعد میں اکیڈمی کے گورنرز ایوارڈز اور سائنسی اور تکنیکی ایوارڈ غیر معینہ مدت کے لئے ملتوی کردیئے گئے۔ برٹش اکیڈمی آف فلم اینڈ ٹیلی ویژن آرٹس (بافا) نے بھی اس کی پیروی کرتے ہوئے ایوارڈزکو ملتوی کردیا۔حتی کہ22 جون کو گولڈن گلوب ایوارڈ جنوری کے شروع سے لے کر 28 فروری 2021 تک (اکیڈمی ایوارڈز کی سابقہ تاریخ) کوبھی موخر کردیا گیا۔

کرک ڈگلس

سٹیج اور سکرین پر چھ دہائیوں تک راج کرنے اور اپنے فن کا لوہا منوانے ہالی وڈ اداکار کرک ڈگلس5 فروری کو 103 برس کی عمر میں چل بسے ۔ ان کی مشہور فلموں میں چیمپئن، لسٹ فار لائف، پاتھس آف گلوری، دی وائیکنگز اور اسپارٹکس شامل ہیں۔انہیں تین مرتبہ اکیڈمی ایوارڈز کی بہترین اداکار کی کیٹگری میں نامزد کیا گیا تھا۔ وہ آسکر جیتنے والے اداکار مائیکل ڈگلس کے والد تھے۔

میکس وون سیڈو

ویسے تو موجودہ نسل میکس وون سیڈو کو شہرہ آفاق فینٹیسی ڈرامہ سیریز گیم آف تھرونز کی وجہ سے زیادہ جانتی ہے۔ لیکن سوئیڈن سے تعلق رکھنے والے اس اداکار نے اپنے 70 سالہ کریئر میں لاتعداد یورپی اور ہالی وڈ فلموں میں کام کیا۔’’ اونلی اے مدر‘‘ سے کام شروع کرنے والے اداکار نے دی ایکزورزسٹ، اسٹار وارز، دی فورس اویکنس اور مائنارٹی رپورٹ جیسی ہٹ فلموں میں بھی اداکاری کی۔

برائن ڈینیہی

برائن ڈینیہی کو اگر 80 کی دہائی کا سب سے خطرناک ولن کہا جائے تو غلط نہ ہو گا۔ ریمبو، گورکی پارک، سلوراڈو اور لیگل ایگلز جیسی معروف ہالی ووڈ فلموں میں ولن کا کردار ادا کرنے والے اداکار بھی اس سال اپنے مداحوں کو افسردہ چھوڑ گئے۔ 81 سالہ اداکار نے ہالی ووڈ میں فلموں کے ساتھ ساتھ کئی ٹی وی شوز میں بھی اداکاری کی جن میں کوجیک، ہنٹر اور بلیک لسٹ شامل ہیں۔

جوئل شوماکر

ہالی ووڈ کے ٹاپ ہدایت کار جوئل شوماکر 80 برس کی عمر میں چل بسے۔ انہوں نے بیٹ مین سیریز کی دو فلموں کے ساتھ ساتھ اے ٹائم ٹو کل، ایٹ ایم ایم، بیڈ کمپنی اور ٹریس پاس جیسی فلمیں ڈائریکٹ کیں۔

کارل رائینر

معروف اداکار اور کامیڈین کارل رائنر 98 سال کی عمر میں اپنے چاہنے والوں سے بچھڑ گئے۔ موجودہ نسل انہیں  اوشنز  فلم سیریز میں سائول بلوم کے کریکٹر کی وجہ سے پہچانتی ہے۔ لیکن انہوں نے ہدایت کاری اور اسکرپٹ رائٹنگ کے ساتھ ساتھ تھیٹر پر بھی بہت کام کیا۔

اینیو موریکون

ہالی ووڈ کی لاتعداد فلموں کی موسیقی ترتیب دینے والے اطالوی کمپوزر اینیو موری کون بھی اس سال 91 برس کی عمر میں اس دنیا سے رخصت ہوئے۔ انہوں نے کلنٹ ایسٹ وڈ کی مشہور فلموں فار اے فیو ڈالرز مور، اے فسٹ فل آف ڈالرز اور  دی گڈ، دی بیڈ اینڈ دی اگلی  کے بیک گراؤنڈ اسکور کے ساتھ ساتھ حال ہی میں ریلیز ہونے والی دی ہیٹ فل ایٹ کی موسیقی بھی ترتیب دی جس پر انہیں ان کے 70 سالہ طویل کریئر کا واحد اکیڈمی ایوارڈ ملا۔

اولیویا ڈی ہیوی لینڈ

ہالی ووڈ کے گولڈن ایرا کی نامور اداکارہ اور دی ایڈونچرز آف رابن ہڈ اور گون ود دا ونڈ سے شہرت پانے والی امریکی اداکارہ اولیویا ڈی ہیوی لینڈ بھی اس سال 104 برس کی عمر میں وفات پا گئیں۔ انہیں ایک نہیں دو مرتبہ اکیڈمی ایوارڈ جیتنے کا اعزاز بھی حاصل ہے جو انہوں نے ٹو اِیچ ہز اون اور دی ایئریس میں اداکاری پر جیتے۔

چیڈویک بوسمین

سپر ہیرو  بلیک پینتھر  کا کردار نبھانے والے ہالی ووڈ اداکار چیڈوک بوسمین اسی سال کینسر کے باعث چل بسے ۔ 43 سالہ اداکار کی دیگر مشہور اور سپر ہٹ فلموں میں گیٹ آن اپ، کپیٹن امریکہ: سول وار، بلیک پینتھر، دی ایونجرز: انفنیٹی وار، اور دی ایونجرز اینڈ گیم شامل ہیں۔

ڈیانا رگ

ویسے تو ہالی وڈ میں کئی بانڈ گرلز گزری ہیں لیکن اگر کسی اداکارہ کو مسز جیمز بانڈ بننے کا اعزاز حاصل ہوا تو وہ تھیں برطانوی اداکارہ ڈیانا رگ۔ انہوں نے ناصرف 60ء کی دہائی میں  دی ایونجرز  جیسی مشہور سیریز میں کام کیا بلکہ فینٹیسی ڈراما سیریز  گیم آف تھرونز  میں بھی اپنی اداکاری کے جوہر دکھائے۔

ایڈی وین ہیلن

معروف گٹارسٹ اور راک بینڈ وین ہیلن کے شریک بانی ایڈی وین ہیلن بھی اسی سال کینسر کے خلاف جنگ ہار گئے۔ 65 سالہ ڈچ امریکی موسیقار کا سب سے مشہور گانا ’جمپ‘ تھا جس نے 80 کی دہائی میں میوزک چارٹس میں تہلکہ مچا دیا تھا۔

جمیز بانڈ شان کونری

سکاٹ لینڈ سے تعلق رکھنے والے اداکار شان کونری 25 اگست 1930 کو پیدا ہوئے اور 90 سال کی عمر میں وفات پاگئے، شان کونری نے تجسس سے بھرپور فلم ’’جیمز بانڈ‘‘کی ابتدائی 7 فلموں میں اپنی اداکاری کے جوہر دکھائے اور جیمز بانڈ کے کردار کوامرکردیا۔ شاندار اداکاری کے عوض شان کونری کو آسکرز سمیت کئی ایوارڈز سے نوازا گیا گیا جبکہ سن 2000 میں آپ کو ملکہ برطانیہ کی جانب سے سرکے خطاب سے بھی نوازا گیا، شان کونری کا کیریئر 3 دہائیوں پر محیط تھا جس دوران انہوں نے درجنوں فلموں میں اداکاری کی ۔ آپ کا شمار عظیم اداکاروں کی فہرست میں کیا جاتا ہے۔ان کی دیگر یادگار فلموں میں ڈاکٹر نو، تھنڈر بال، انڈیانا جونز اینڈ دی لاسٹ کروسیڈ، دی ان ٹچ ایبلز، دی راک اور اینٹریپمنٹ شامل ہیں۔

جان لی کارے

رواں سال کے آخری مہینے میں معروف برطانوی رائٹر جان لی کارے 89 سال کی عمر میں انتقال کرگئے۔ ان کے ناولز پر بنی فلمیں دی اسپائی ہو کیم ان فرام دی کولڈ، دی رشیا ہاؤس، دی کونسٹنٹ گارڈنر، ٹنکر ٹیلر سولجر اسپائے، اے موسٹ وانٹڈ مین اور دی نائیٹ مینیجر لوگوں میں بے حد مقبول ہوئیں۔

اسی سال فلم اسٹار جان ٹریوولٹا کی اہلیہ اداکارہ کیلی پریسٹن، اسٹار وارز سیریز میں ڈارتھ ویڈر کا لباس پہن کر ایکٹنگ کرنے والے ڈیوڈ پراؤز، فلم ڈرٹی ہیری اور کوبرا میں پولیس افسر کا کردار ادا کرنے والے رینی سینٹونی، معروف برطانوی اداکار این ہوم، جیمز بانڈ کی فلم گولڈ فنگر میں پسی گیلور کے کردار سے شہرت پانے والی آنر بلیک مین، اور معروف پروڈیوسر کین اسپیئرز بھی وفات پا گئے۔

گزشتہ برس بچھڑنے والے بالی ووڈ فنکار

بالی ووڈ میں 2020ء کو بدقسمت واقعات کا سال تصور کیاجارہاہے کیونکہ امسال اس نے تفریحی صنعت کی متعدد مشہور شخصیات کو کھو دیا اور ان فلمی ستاروں کی عدم موجودگی نے ایک ایسا خلاء پیدا کردیا ہے کہ جو کبھی بھی پْر نہیں ہوسکے گا۔

اریا بینرجی

محبت ، جنس اور دھوکاجیسی کامیاب فلموں سے ہندی فلمی صنعت میں قدم رکھنے والی اور فلم  دی ڈرٹی پکچر  میں شکیلہ کا کردار ادا کرنے والی اریابینرجی جنوبی کلکتہ میں اپنے اپارٹمنٹ میں مردہ پائی گئیں۔

استاد ڈیبو

مشہور ڈانسر اور کوریوگرافر ، جنہوں نے کتھک اور کتھکالی دونوں کلاسیکی رقص میں بھارتی ہندی فلموں میں اپنی مہارت کے گر دکھائے 10 دسمبر کو مختصر علالت کے بعد ممبئی میں انتقال کر گئے۔ وہ 73 برس کے تھے۔

نریندر بھیڑے

نریندر بھیڑے مراٹھی انڈسٹری کے ایک مشہور میوزک ڈائریکٹر تھے۔ وہ متعدد مشہور فلموں کے میوزک ڈائریکٹر تھے۔ وہ دس دسمبر کو دل کا دورہ پڑنے کی وجہ سے انتقال کر گئے تھے۔ ان کی عمر 47 سال تھی۔

دیویا بھٹناگر

ٹی وی اداکارہ دیویا بھٹناگر جو، یہ رشتہ کیا کہتا ہے ڈرامہ میں اپنے کردار کے لئے بھارت اور پاکستان دونوں ممالک میں ڈرامہ کی شوقین خواتین میں مشہور تھیں ، مبینہ طور پر کوویڈ 19 کی پیچیدگیوں کے بعد انتقال کر گئیں۔ دیویہ بھٹناگر کی عمر 34 سال تھی۔

روی پٹوردھن

انہیں اپنے طاقتور کردار اور گہری آواز کے لئے جانا جاتا ہے ، ممتاز مراٹھی اور ہندی فلمی اداکار روی پٹوردھن کا 6 دسمبر کو انتقال ہوا۔ ان کی عمر 84 سال تھی۔ انہوں نے 150 ڈراموں اور 200 سے زیادہ فلموں میں اداکاری کے جوہردکھائے۔

سونترا چٹرجی

لیجنڈری بنگالی اداکار سونترا چٹرجی نے 15 نومبر کو کلکتہ کے ایک اسپتال میں 85 سال کی عمر میں آخری سانس لیا، جہاں وہ کورونا وائرس کے مثبت ٹیسٹ کے بعد گزشتہ 40 دن سے داخل تھیں۔ بنگالی کے علاوہ ، چٹرجی نے نیروپمام اور ہندوستانی فلم سپاہی سمیت متعدد ہندی فلموں میں بھی کام کیا تھا۔

آصف بسرا

بالی ووڈ اداکار آصف بسرا 12 نومبر کو شمالی پہاڑی شہر دھرم شالا میں واقع ایک نجی کمپلیکس میں مردہ حالت میں پائے گئے تھے۔ جب پولیس موقع پر پہنچی تو اداکار اس کمپلیکس میں لٹکے ہوئے پائے گئے، تاہم ان کے انتہائی اقدام اٹھانے کی وجہ آج تک معلوم نہ ہو سکی۔

اویناش کھارشیکر

تجربہ کار اداکاروپروڈیوسر اویناش کھارشیکر کا8 اکتوبر کی صبح اپنی رہائش گاہ پر دل کا دورہ پڑنے کے باعث انتقال ہوگیا۔ اداکار پروڈیوسر نے مراٹھی انٹرٹینمنٹ انڈسٹری میں بیشتر نامور فلموں میں اپنے فن کالوہا منوایا۔

ایس پی بالسوبراہمانیام

چھ بار قومی ایوارڈ یافتہ لیجنڈری پلے بیک گلوکار ایس پی بالسوبراہمانیام نے 25 ستمبر کو چنئی میں آخری سانس لی۔ وہ 74 سال کے تھے۔ انہیں 26 ستمبر کو پورے ریاستی اعزاز کے ساتھ سپرد خاک کردیا گیا۔انہیں 16 ہندوستانی زبانوں میں گانے کی صلاحیت رکھنے کے باعث انڈسٹری میں منفرد مقام حاصل تھا۔ پانچ دہائیوں پر محیط اپنے گائیکی کیریئر میں ، انہوں نے 40ہزار سے زیادہ گانے ریکارڈ کیے۔

اشالتا وابگونکر

تجربہ کار مراٹھی فلم اور تھیٹر اداکارہ اشالتا وابگونکر 22 ستمبر کو انتقال کر گئیں۔موت سے ایک ہفتہ قبل ہی انہوں نے ایک افسانوی شو کی شوٹنگ کے دوران کووڈ19کا معاہدہ کیا تھا۔ انہوں نے 100 سے زائد ہندی اور مراٹھی فلموں میں کردارادا کیا۔ اشالتا نے ایک کتاب گارڈ سبھاوتی بھی لکھی ، جس میں تفریحی صنعت میں یادوں اور اس کے سفر کو دکھایا گیا ہے۔

نشکنت کامت

ہدایتکارواداکار نشکنت کامت جگر کی پیچیدگیوں کے بعد 17 اگست کو حیدرآباد کے ایک اسپتال میں انتقال کر گئے۔ کامت کوکامیاب بالی ووڈ فلموں کی ہدایت کاری کے لئے جانا جاتا ہے اور انہوں نے اجے دیوگن،تبو اورعرفان خان کی نامور فلموں کی ہدایت کاری کی۔

راجت مکھرجی

منوج باجپائی کی روڈ اور رومانٹک تھرلر پیارے تونے کیا کیا کی ہدایتکاری کے لئے مشہور فلمی صنعتکار راجت مکھرجی 19 جون کی شام گردے کی بیماریوں کے سبب چل بسے۔

جگ دیپ

تجربہ کار ہندی فلم مزاح نگار جگدیپ ،جنہوں نے کئی دہائیوں پر محیط اپنے کیریئر میں مختلف قسم کے کرداروں کے ذریعے اپنے لاکھوں ہندوستانی پرستاروں کو راغب کیا 9 جولائی کو 81 سال کی عمر میں انتقال کرگئے۔

ہریش شاہ

ہریش شاہ ، جنہوں نے دھرمیندر ، شتروگھن سنہا اور راجیو کپور کی متعددفلموں کی ہدایتکاری کی،7 جولائی کو 76 سال کی عمر میں انتقال کر گئے۔وہ 10سالوں سے گلے کے کینسر سے لڑ رہے تھے۔ انہوں نے راجیش کھنہ کی فلم میری زندگی سایہ (1972) کالا سونا (1975)،رام تیری کتنے نام جیسی فلموں کو ہدایتکاری کی۔

سروج خان

تین بار قومی ایوارڈ یافتہ بالی ووڈ کی تجربہ کار کوریوگرافر سروج خان کا 3 جولائی کو دل کا دورہ پڑنے کے باعث انتقال ہوگیا۔ وہ 71 برس کی تھیں۔ انہوں نے بطور چائلڈ آرٹسٹ فلم انڈسٹری میں کیرئیرکاآغاز کیااور بالآخر 1950 کی دہائی میں بیک گراؤنڈ ڈانسر بن گئیں۔ انہوں نے فلم مسٹر انڈیا (1987) کے گانے ہووا ہوائی سے شہرت حاصل کی۔

سوشانت سنگھ راجپوت

سوشانت سنگھ راجپوت 14 جون کو باندرافلیٹ میں مردہ حالت میں پائے گئے، ان کی عمر 34 سال تھی۔انہوں نے ایم ایس دھونی، دی انٹولڈ اسٹوری ، بدیسی رومانویس اور چھچھور سمیت دیگر سپرہٹ فلموں میں کام کیا۔ ان کے انتقال کے بعد بالی ووڈ میں مبینہ اقرباء پروری اور حمایت پسندی اور متعدد مشہور شخصیات اور سیاستدانوں کے بارے میں سوشل میڈیا پر ایک بحث چھڑ گئی، جس میں ان کی موت کی سی بی آئی تحقیقات کا مطالبہ کیا گیا۔

باسو چیٹرجی

لیجنڈری ڈائریکٹر باسو چیٹرجی 4 جون کو ممبئی میں 90 سال کی عمر میں انتقال کرگئے۔وہ چھوٹی سی بات (1975) ، رجنی گندھا (1974) ، پیا کا گھر (1972) ، کھٹہ میٹھا ، چکرویو (1978) ، باتوں باتوں میں (1979) جیسی فلموں کی ڈائریکشن کی وجہ سے مشہور تھے۔

واجد خان

موسیقار جوڑی ساجد واجد کے رکن واجد خان یکم جون کو 42 سال کی عمر میں انتقال کر گئے۔ ساجد واجد نے بالی ووڈ میں اپنے کیرئیرکاآغازسلمان خان کی 1998 میں آنے والی فلم پیار کیا تو ڈرناکیاسے کیا۔

اداکار موہت باغیل جو سلمان خان کی فلم ریڈی میں امر چودھری کے کردار کے باعث مشہور ہیں ، 23 مئی کو کینسر کی وجہ سے انتقال کر گئے۔

رشی کپور

بالی ووڈ اداکار رشی کپور لیوکیمیاجیسے مرض کے ساتھ دو سال طویل جنگ کے بعد 30 اپریل کو 67 سال کی عمر میں ممبئی میں انتقال کر گئے۔ مبینہ طور پر تقریبا ایک سال تک امریکہ میں زیر علاج رہنے کے بعد یہ اداکار ستمبر 2019 میں ہندوستان واپس آئے تھے۔تین نسلوں تک فلم انڈسٹری پر راج کرنے والی کپور فیملی کے اداکار رشی کپور ،اداکار راج کپور کے دوسرے بیٹے اور پرتھوی راج کپور کے پوتے تھے۔ انہوں نے بطور چائلڈ آرٹسٹ کیریئر کا آغاز میرا نام جوکر (1970) سے کیا جس کے لیے انہیں قومی ایوارڈ بھی ملا۔

عرفان خان

لیجنڈری اداکار عرفان خان نے ممبئی میں 29 اپریل2020 کو اپنی آخری سانس لی۔ اداکار طویل عرصے سے علیل تھے اور ان کے انتقال سے ایک ہفتہ قبل انہیں کولن انفیکشن کی تشخیص کی گئی تھی، جبکہ 2018 میں نیوروینڈوکرائن ٹیومر کی تشخیص ہوئی تھی۔عرفان اپنی اداکاری کی غیر معمولی مہارت کے لئے جانے جاتے تھے اور انہیں مغرب میں ہندوستان کا چہرہ بھی کہا جاتا تھا۔

تحریر : محمد اسلام کھکھٹی