لاہور: (دنیا نیوز) برصغیر کے معروف اور قادر الکلام شاعر جوش ملیح آبادی کا 127واں یوم پیدائش آج منایا جا رہا ہے۔
جوش ملیح آبادی 5 دسمبر 1898ء کو ایک علمی و ادبی گھرانے میں پیدا ہوئے، ان کا اصل نام شبیر حسن خاں جبکہ جوش قلمی نام تھا، وہ ملیح آباد کے رہنے والے تھے اس لیے اسے اپنے نام کا حصہ بنا لیا، جوش تقسیم ہند کے بعد ترک سکونت کرکے کراچی قیام پذیر ہوگئے۔
جوش ملیح آبادی قادر الکلام شاعر تھے جنہیں الفاظ کا سمندر کہا جاتا تھا، انہوں نے پہلا شعر محض 9 برس کی عمر میں کہا تھا، انہیں اردو، ہندی، فارسی، عربی اور انگریزی زبانوں پر عبور حاصل تھا۔
جوش ملیح آبادی شاعری کی کثیر کتب کے مصنف تھے، ان کی معرکۃ الآرا تصانیف میں شعلہ و شبنم، جنون و حکمت، فکرو نشاط، عروس ادب، حرف و حکایت، روح ادب، آوارہ حق، سنبل و سلاسل اور ان کی خود نوشت سوانح یادوں کی برات قابل ذکر ہیں۔
جوش ملیح آبادی شاعر بھی تھے، مجاہد آزادی بھی، اچھے نثر نگار بھی، مدیر بھی، نغمہ نگار بھی اور بہت اچھے صحافی بھی، جوش 1948ء میں رسالہ ’آج کل‘ کے ایڈیٹر مقرر ہوئے اور 1955ء تک اس سے جڑے رہے۔
متعدد خوبیوں کے مالک جوش کا وصف یہ ہے کہ وہ جہاں بھی رہے مسلسل لکھتے رہے، اردو ادب کے عظیم سرمایہ الفاظ کے سمندر جوش ملیح آبادی 22 فروری 1982ء کو انتقال کر گئے۔
