اسلام آباد: (دنیا نیوز) وفاقی وزیر اطلاعات عطا اللہ تارڑ نے کہا ہے کہ سابق حکومت کے غیر ذمہ دارانہ بیانات نے قومی ایئر لائنز (پی آئی اے) کو اربوں کا نقصان پہنچایا۔
اسلام آباد ہائیکورٹ کے باہر میڈیا سے گفتگو کرتے ہوئے وفاقی وزیر عطا تارڑ کا کہنا تھا کہ شالیمار ریکارڈنگ اینڈ براڈ کاسٹنگ کارپوریشن کے ملازمین کو تنخواہوں کی ادائیگی پر عدالت کے مشکور ہیں، کافی عرصے سے کمپنی کی بندش کا عمل چل رہا ہے، اس دوران سینکڑوں ملازمین کے روزگار کو خطرہ لاحق ہے، اس لئے عدالت میں حاضر ہو کر استدعا کی ہے کہ کمپنی کو بند نہ کیا جائے۔
انہوں نے کہا کہ عدالت نے کمپنی کا بزنس پلان پیش کرنے کی ہدایت کی ہے، ہم کمپنی کے بزنس پلان پر کام کر رہے ہیں اور جلد عدالت میں جمع کرائیں گے تاکہ کمپنی کی سرگرمیاں بحال کی جا سکیں، عدالت کے مشکور ہیں جنہوں نے آڈیٹر کو ملازمین کی تنخواہوں کی ادائیگی کی ہدایت دی۔
پی آئی اے سے متعلق بات کرتے ہوئے عطا تارڑ کا کہنا تھا کہ سابقہ سیاسی حکومت کے ایک غیر ذمہ دارانہ بیان کی وجہ سے پی آئی اے پر بین الاقوامی پابندیاں عائد ہوئیں، خوشی ہے کہ ہماری حکومت کے دوران یہ پابندیاں ختم ہوئیں۔
انہوں نے کہا کہ وزیراعظم اور وزیر ہوابازی کی خصوصی توجہ سے پی آئی اے نے یوکے اور یورپ کے لئے فضائی آپریشن بحال کیا جو بیرونِ ملک مقیم پاکستانیوں کے لئے ایک بڑی سہولت ہے۔
خیبرپختونخوا کی صورتحال پر تنقید کرتے ہوئے عطا تارڑ کا کہنا تھا کہ صوبے میں بد انتظامی اور کرپشن کا بازار گرم ہے، دریائے سوات پر سیاحوں کی جانوں کا تحفظ ممکن نہ بنانا انتظامی ناکامی ہے، خیبرپختونخوا میں کرپشن کے انبار لگے ہوئے ہیں۔
