میامی: (ویب ڈیسک) امریکا میں ایک خاکروب کو سٹار فٹبالر لیونل میسی سے آٹوگراف لینا مہنگا پڑ گیا۔
برطانوی میڈیا کے مطابق امریکا کے انٹر میامی کلب کا حصہ بننے والے اور ارجنٹائن کو ورلڈ کپ جتوانے والے لیونل میسی سٹیڈیم پہنچے تو وہاں کام پر موجود میسی کے پرستار خاکروب نے ورلڈ چیمپئن کا نعرہ لگایا اور میسی کی جانب اپنی شرٹ پھینکی جسے میسی نے آٹوگراف دے کر واپس کر دیا۔
کلب انتظامیہ نے معاملے کا نوٹس لیتے ہوئے خاکروب کو فوری طور پر نوکری سے نکال دیا۔
خاکروب کا کہنا ہے کہ مجھے علم تھا کہ انٹر میامی کلب کے اصول اور معیار بہت سخت ہے، کلب کے ملازمین اور باہر سے لئے گئے ملازمین پر پابندی ہوتی ہے کہ وہ فٹبالرز کو ہرگز پریشان نہیں کریں گے اور ان سے کسی قسم کی تصویر، آٹوگراف وغیرہ کا مطالبہ نہیں کریں گے۔
خاکروب کو نوکری سے نکالنے پر متعدد سوشل میڈیا صارفین فیصلے کو سخت قرار دیتے ہوئے کلب انتظامیہ کو شدید تنقید کا نشانہ بنایا۔
سٹار فٹبالر لیونل میسی امریکا میں بہت مقبول ہیں اور لوگ ان کی ایک جھلک دیکھنے کے لئے گھنٹوں کلب سٹیڈیم کے باہر کھڑے رہتے ہیں۔
