نئی دہلی: (دنیا نیوز) بھارتی وزیراعظم نریندر مودی اور روسی صدر ولادیمیر پیوٹن میں ٹیلی فونک رابطہ ہوا ہے جس میں یوکرین تنازع، دو طرفہ تعلقات اور حالیہ تجارتی مسائل پر تفصیلی بات چیت کی گئی۔
مودی نے ایکس پر لکھا کہ پیوٹن نے یوکرین کی تازہ صورتحال سے آگاہ کیا، دونوں رہنماؤں نے بھارت-روس خصوصی اور ترجیحی سٹریٹیجک شراکت داری کو مزید مضبوط بنانے کے عزم کا اعادہ کیا۔
مودی نے پیوٹن کو اس سال کے آخر میں بھارت کا دورہ کرنے کی دعوت دی اور پیوٹن کی آمادگی پر خیرمقدم کیا۔
یہ رابطہ اس وقت ہوا جب امریکی صدر ڈونلڈ ٹرمپ نے روس سے تیل درآمد کرنے پر بھارت پر اضافی محصولات عائد کرنے کا اعلان کیا ہے، جسے بھارت نے غیر منصفانہ اور بلاجواز قرار دیا۔
بھارت کا مؤقف ہے کہ روسی تیل کی درآمدات مارکیٹ عوامل اور 1.4 ارب آبادی کی توانائی سلامتی کو مدنظر رکھ کر کی جاتی ہیں۔
بھارتی وزیراعظم مودی نے یوکرین مسئلے کے پرامن حل پر بھارت کے مستقل مؤقف کو دہرایا، اس رابطے سے ایک روز قبل بھارتی قومی سلامتی کے مشیر اجیت ڈووال نے ماسکو میں صدر پیوٹن سے ملاقات کی تھی۔
پیوٹن کا بھارت کا آخری دورہ دسمبر 2021 میں ہوا تھا جبکہ مودی نے گزشتہ سال 2 بار روس کا دورہ کیا، جن میں جولائی میں سالانہ سربراہی اجلاس اور اکتوبر میں کازان میں ہونے والی برکس کانفرنس میں شرکت شامل ہے۔
واضح رہے کہ امریکا کی طرف سے دباؤ بڑھنے پر نریندر مودی اب 7 سال بعد چین کا دورہ کرنے بھی جا رہے ہیں۔
